BLF mælir frá at leggja Búskaparráðið og nevndina fyri Landsbankan saman

Landsstýrismaðurin í fíggjarmálum hevur sent Búskapar- og Løgfrøðingafelag Føroya tvey uppskot til ummælis, ið snúgva seg um umskipan av Búskaparráðnum og broyting av nevndini fyri Landsbankan og aðrar broytingar.

BLF hevur í ummæli sínum av hesum uppskotum mælt frá at leggja Búskaparráðið og nevndina fyri Landsbankan saman. Felagið hevur eisini aðrar viðmerkingar, ið snúgva seg um at tryggja neyðugu førleikarnir í ávíkavist Búskaparráðnum og nevndini fyri Landsbankan, og at tryggja, at hesi kunnu virka óheft af politisku skipanini. Ummælisskrivið og uppskotini til ummælis síggjast her.

Gakk heim tiltak, fríggjadagin 26. februar 2021

Fríggjadagin 26. februar skipar BLF aftur fyri Gakk heim tiltaki, sum verður hildið á Hotel Hafnia. Dyrnar lata upp kl. 15.30.

Á fundinum vera framløgur, ábit og hugni. Tiltakið er ókeypis fyri limir felagsins.

Orsakað av koronutilmælunum er ynskiligt, at limir boða frá luttøku í seinasta lagi mikudagin 24. februar kl. 12, hetta fyri at Hotel Hafnia kann leggja tiltakið til rættis, soleiðis at tað ber til at halda tilmælini.